Tordoia aproba o Plan de Obras e Servicios (POS) 2013
adicado á mellora de viais e accesos por importe de máis de 200.000€.
O importe estará dirixido á mellora da rede de
infraestruturas viais e accesos de lugares de Gorgullos, Santaia, Anxeriz e
Andoio.
O Concello de Tordoia ven de anunciar a relación de obras
que ten previsto executar para este ano baixo o POS 2013 por un importe de máis
de 200.000€ que se dedicarán fundamentalmente a pavimentación e mellora de
viais e accesos. Segundo explicou o rexedor tordoiés a obra máis importante que
se acometerá este ano será a ampliación do acceso á igrexa de Gorgullos.
“Trátase da segunda fase dun proxecto de case 300.000€ na que xa comezamos a
traballar o ano pasado para mellorar os accesos en Santaia e o recinto que está
arredor da igrexa de Gorgullos”. Para esta obra o importe destinado é de
88.087,33€.
O segundo dos proxectos incluidos no POS, por un importe de
61.464,95€, é o da pavimentación en San Mamede (Andoio) e que tamén incorpora a
pavimentación dunha rúa no lugar de Folgueira e os accesos a Torre, ambos na
parroquia de Anxeriz e o arranxo do camiño entre Fornelos e Ponte, en Tordoia.
Finalmente, o terceiro proxecto que se aprobou no POS 2013 coa abstención do grupo
municipal socialista no último pleno municipal celebrado, inclúe a
rehabilitación de catro accesos en Gorgullos, Anxeriz e Cabaleiros, a
pavimentación dos accesos ata Xardín, en Santaia e a mellora do camiño que une
Brandoñas coa estrada xeral, tamén en Anxeriz. Estas obras incluídas no
terceiro proxecto ascenden a un investimento total de 52.738,79 euros.
Coa aprobación destas obras, o Concello de Tordoia acometerá
melloras nos accesos en cinco puntos, pavimentacións noutros tres lugares así
como mellora dous camiños. “O mantemento en boas condicións da extensa rede de
viais e camiños do concello require grandes orzamentos polo que é necesario
facer un estudo pormenorizado daqueles que están precisados dunha intervención
máis urxente ou que teñen maior número de usuarios”, explicou Antonio
Pereiro.
Finalmente, 48.271,30€ do POS quedaron destinados ao
financiamento de gastos correntes, polo que o importe total do plan provincial
para este ano ascende a un total de 250.562,37 euros, un investimento
práctimente igual ao do ano pasado, que ascendeu a case 265.000 euros.
No hay comentarios:
Publicar un comentario