O Pleno municipal do Concello de
Tordoia aprobou o pasado xoves 29 de marzo por uninimidade o Plan de
Axuste proposto pola corporación municipal nun pleno de carácter extraordinario
ao que non acudiu a oposición por adherirse ao día de folga xeral, aínda que sí
recoñeceron que o pleno estaba ben convocado. Así, coa ausencia dos tres
concelleiros do grupo socialista que compoñen a oposición, o alcalde de Tordoia
expuxo o plan de viabilidade previsto polo goberno local e no que se prevén
unha serie de medidas conducentes tanto a incrementar o capítulo de ingresos
como a diminuir o de gastos. Segundo explicou o rexedor, Antonio Pereiro, “o noso obxectivo é acadar un aforro neste
exercicio de arredor de 200.000 euros”.
Entre as
medidas establecidas polo plan de axuste esixido polo do Real Decreto-Lei
4/2012 ao que se acolleu o Concello de Tordoia establécese unha previsión da
reducción dun 25% no capítulo de persoal e unha reducción da mesma porcentaxe
no capítulo de bens e servizos, que se traducirá nun aforro na factura da
electricidade, teléfono, publicidade, suministro de materiais e gastos de
mantemento. Neste sentido, Pereiro incidiu especialmente no capítulo da factura
da luz no que o Concello xa leva traballando algún tempo co obxecto de
acadar un considerable aforro: “actualmente
o gasto neste capítulo é de 2€ por mes e habitante e o noso obxectivo é deixalo
en 1,4€”, explicou. Ademais o rexedor tordoiés anunciou que non se contratará máis persoal que aquel
para o que se conta cunha subvención do 100%. De igual xeito, no capítulo
de investimentos tan só se acometerán as
obras máis urxentes e aquelas para as que o Concello acade unha subvención do
100%. “As veces as subvencións son un regalo envenenado xa que nos obriga a
asumir unha parte da obra e adiantar uns cartos que logo a Administración
Pública tarda bastante tempo e abonar”, reflexionaba o Alcalde de Tordoia.
Neste sentido, Antonio
Pereiro explicou que boa parte do que o Concello adebeda encádrase no capítulo
de investimentos. “Actualmente o
Concello adebeda facturas por un total de 1.400.000 euros dos que máis do 60%
corresponde a investimentos. De feito tamén temos máis de 450.000 euros que nos
adebedan as distintas administracións públicas (Deputación e Xunta) e que aínda
non nos abonaron. Por iso a solicitude do crédito ICO ao que nos acollemos foi
de 950.000 euros que teremos que amortizar nun prazo de 10 anos con dous anos
de carencia”, explicou Pereiro Liñares, quen entende que a medida será moi
positiva para que os provedores poidan cobrar os cartos que se lles adebedan.
Actualización de padróns fiscais
Xunto con estas
medidas, o Plan de Axuste previsto polo Concello de Tordoia inclúe a
necesidade de asinar coa Deputación os convenios necesarios para actualizar os
padróns fiscais e a aplicación das ordenanzas fiscais para a recadación dos
diferentes feitos impoñibles. Estas
medidas traduciranse nunha suba das taxas de lixo, IBI e contribución axustando
o recadamento ao coste real do servizo. Esta medida está dirixida
fundamentalmente á recollida de lixo que, ao longo destes anos foi lastrando as
contas municipais posto que apenas se repercutía no veciño o 50% do coste real
do servizo de recollida de lixo. En canto á revisión das taxas, Antonio Pereiro
explicou que a medida non é nova, xa que se contemplaba no plan de austeridade
posto en marcha o ano pasado e aprobado polo pleno municipal o pasado mes de
outubro. Polo tanto a medida non
significa novas taxas senón que se trata de recoller no plan de axuste unha
medida que funciona desde o ano pasado como son as taxas polo uso do pavillón
municipal, os locais sociais ou a Casa da Cultura.
Por último, o plan recolle
tamén a necesidade de optimizar ao máximo o traballo no Concello,
mellorando a estrutura organizativa e elaborando un organigrama de funcións e
definicións do traballo de cada un dos departamentos. O obxectivo final de
todas estas medidas será, como para o resto dos concellos, ir cadrando as
contas municipais e aforrar os cartos precisos para amortizar o crédito ICO.
Fonte: Santiago y Comarca
No hay comentarios:
Publicar un comentario